1 Mlongi mayagashii kwa Mtuwa Mlungu toziya ndo muheri,

toziya ufiru wakuyi ulikala mashaka goseri!

2 Mtakuli hangu, mwenga yamlopolitwi na Mtuwa Mlungu,

wantu weni kawalopoliti kulawa mumawoku mwa wankondu,

3 kawajojoniriti kulawa isi ya shihenga:

kulawa kwagulawa mshenji na kwaguzyeta mshenji,

kulawa kushana na kusika.

4 Woseri wayeritiyeriti mushiwala,

pota wawonandiri njira ya kugenda ku mji su kulikala.

5 Waweriti na njala na wimuluwa,

waheriti makakala nakamu.

6 Muntabiku yawu wamliliriti Mtuwa Mlungu,

nayomberi kawalopola muntabiku yawu.

7 Kawalonguziya munjira yayinyoshikiti,

mpaka wasoka mji gwa kulikala.

8 Su wamgambiri mayagashii Mtuwa Mlungu kwa ufiru wakuyi mkulu,

na kwa matendu gakuyi gakulikangasha gakawatendiriti wantu.

9 Yomberi kapeliziya kwimiluwa,

na yawana njala kawikutuziya maheri.

10 Walii yawalikaliti mluwindu na luwindu dunyu,

na watatilwa muminyololu,

11 toziya wagagalambukiti visoweru vya Mlungu,

na kugabeziya matakuziya gakuyi Mlungu gwa kumpindi.

12 Watokiti kwa lihengu likamala,

Waguwa pasi na paweritindiri muntu gwa kuwatanga.

13 Muntabika yawu wamlilira Mtuwa Mlungu,

nayomberi kawalopola mumatesu gawu.

14 Kawalaviyiti mluwindu na luwindu dunyu,

na minyololu yawu kayimeganga.

15 Su wamgambili mayagashii Mtuwa Mlungu kwa ufiru wakuyi mkulu,

na kwa makangashu gakawatendiliti wantu.

16 Yomberi kamega migomi ya shaba,

na kudumuladumula pingu za shuma.

17 Wawaweriti wazigizigi toziya ya ugalambuka wawu,

watabikiti toziya ya ukontola wawu,

18 Wakalaliriti viboga vyoseri,

waweriti sambira kuhowa.

19 Wamlilira Mtuwa Mlungu muntabiku yawu,

nayomberi kawalopola mumatesu gawu.

20 Kwa shisoweru shakuyi kawaponiziyiti,

kawalopola nawagamira.

21 Su wamgambiri mayagashi Mtuwa Mlungu kwa ufiru wakuyi mkulu,

na kwa makangashu gakawatendiriti wantu.

22 Na walaviyi tambiku za kulonga mayagashii,

wimbi kwa nemeru toziya ya matendu gakuyi.

23 Walii yawanitimwanja kwa meli mubahali,

watenditi biashara zawu mumashi matali.

24 Wagawoniti matendu ga Mtuwa Mlungu,

mirandu ya kulikangasha gakatenditi aku.

25 Kalagaliliti na lyega lilawira,

linyasula makupala ga bahari.

26 Meli zinyasulwa pampindi,

nakuwuya pasi pamashi matali.

Muntabiku ayi ugangamala wawu upera.

27 Wawegukaweguka na kushashatika handa walowera,

kudaha kwawu kupera.

28 Muntabiku zawu wamlilira Mtuwa Mlungu,

nayomberi kawalopola mumatesu gawu.

29 Kanyamaziya lyega,

na makupala ga bahari ganyamala.

30 Wanemelera shaka bahali payinyamaliti,

kawalonguziya mpaka pa shiloku sha meli shawashifiriti.

31 Su wamgambili mayagashii Mtuwa Mlungu kwa ufiru wakuyi mkulu,

na kwa makangashu gakawatendiliti wantu.

32 Wamkwisi mulijojoniku lya wantu,

na kumzyuma pashoteramotu sha wazewi.

33 Mlungu kazigalambuliti nshemba kuwera shiwala,

bwiru kaziyumiziyiti nakamu.

34 Litapaka lyana wolera kalitenda litapaka lya munu,

toziya ya ukontola wa wenikaya wakuyi.

35 Kagalambuliti shiwala kuwera matanda ga mashi,

na isi iyuma kuwera mbwiru za mashi.

36 Kawahamiziya aku wananjala,

nawomberi wanyawa mji gwa kulikala.

37 Walimiti malambu na kuyala mizabibu,

wabenanga viboga vivuwa.

38 Kawatekeleriti wantu wakuyi, na weni wongereka,

na walanga ya mifugu yawu yongeleka.

39 Shakapanu walanga yawu payiweriti ndidini na kutokuwera na likakala

kwa kuyonerwa, ntabiku na kwinginika,

40 kawasoniziti wakulu yawawayoneriti,

kwa kuwayeriziya kushiwala kwakuwerandiri na njira.

41 Kumbiti kawalopola wananfiru muntabika zawu,

kongera walongu wawu handa shipinga sha kondolu.

42 Waminika pawawoniti mlandu agu wanemelera,

kumbiti wakontola woseri wanyamala.

43 Yakana luhala na kaliholi mirandu ayi,

kaliholi ufiru mkulu wa Mtuwa Mlungu.