1 Nimlilira Mlungu kwa liziwu,

kwa kubota nimlilira Mlungu su kampikiniri.

2 Shaka sha ntabiku nimluwa Mtuwa Mlungu,

nimtalapisiya liwoku lyangu pashiru pota kutoka,

kumbiti nyamaziwandiri.

3 Panikuholera Mlungu hinginika,

panikuhola mumoyu gwangu gutwezuka.

4 Guntenda nang'onja pashiru poseri,

weriti nammagaziwu ata sinda kutakula.

5 Nankulihola mashaka ga makashu,

vinja vivuwa vyavipititi.

6 Pashiru niliholiti lwimbu lwanimbiti,

moyu gwangu gulihola

rohu yangu ilikosiya,

7 "Hashi, Mtuwa Mlungu katuleka mashaka goseri?

Hashi, hapeni katutenderi maheri kayi?

8 Hashi, ufiru wakuyi woya nakamu?

Hashi, hapeni katendi kayi shakalongiti?

9 Hashi, Mlungu kalyaluwa kuwera na lusungu?

Hashi, maya gakuyi galewelera lusungu lwakuyi?"

10 Shakapanu ntakula, "Ashi ndo shashintama nentu,

Mlungu Mkulu kagalambuka katutenderandiri kayi shintu!"

11 Hanigaholi matendu ga Mtuwa Mlungu,

hanigaholi makangashu gaku ga makashu.

12 Hanigaholi mahengu gaku goseri,

na kugahola matendu gaku makulu.

13 Gwee Mlungu njira yaku ndo nanagala.

Mlungu gaa yakawera mkulu handa gwenga Mlungu gwetu?

14 Gwenga ndo Mlungu yagutenda makangashu,

gwenga gugalanguziya maisi uwezu waku.

15 Kwa liwoku lyaku lya likakala guwakombola wantu waku,

guukombola wiwuka wa Yakobu na Yusufu.

16 Mashi pagakuwoniti gwee Mlungu gakutira,

makupala ga mashi galendemera.

17 Mawundi galaviyiti mashi gavuwa,

nguguma ziguguma kuliyera,

na misali yaku ieneya kila pahala.

18 Ngugumu ipikanilika mulyega,

lumeta lwaku lulangala pasipanu,

pasipanu patikinyika na kulendemera.

19 Gwenga gutuliti njira yaku pampindi pa bahari,

gutyangiti pampindi pa mashi matali,

kumbiti zayu zaku ziwonekandiri.

20 Guwalongoziyiti wantu waku handa kondolu,

pawalongoziwa na Musa na Aruni.