1 Gwee Mlungu,

gumfundi mfalumi kutoza kwa uaminifu,

gumpanani haki yaku mwana gwa mfalumi,

2 katozi wantu waku kwa haki,

na wahushu waku kwa waminika.

3 Migongu ijegi ponga kwa wantu,

vigongu vibweri waminika.

4 Mfalumi kawateteyi yawahera makakala muwamu mwa wantu,

nakawalopoli wana wa wahushu,

na kuwagamiziya yawawonera wantu.

5 Kalikali mashaka gavuwa handa mshenji,

na handa lyezi kwa viyiwuku vyoseri.

6 Kaweri handa mvula yayitowera lirambu,

handa lufolafola lwaluloviya litapaka.

7 Haki yongereki mu makaliru gakuyi goseri,

na ponga iweri mashaka goseri gambira lyezi ntambu yaliwala.

8 Kakolimlima kulawa bahari mpaka bahari,

kulawa lushemba Eufrati mpaka mpeleru za pasipanu.

9 Makabila ga kushiwala gang'ong'onali kulongolu kwakuyi,

wasingani wakuyi wang'ong'onali mpaka washinkuli lidikudiku.

10 Wafalumi wa Tarishishi na visiwa vimlipi kodi,

wafalumi wa Sheba na Seba wamjegeri mafupu.

11 Wafalumi woseri hawamsuntamaliri,

wantu wa maisi goseri wamtenderi.

12 Toziya kamkombola yakahera shintu yakamluwa,

na mhushu yakahera gwa kumtanga.

13 Kawawonera lusungu wahushu na yawahera shintu,

kagalopola makaliru gawu yawananfiru.

14 Kankuwalaviya muukontola na ungesera,

toziya makaliru gawu ndo ga mana nentu kwakuyi.

15 Mfalumi na kalikali makaliru matali,

kanki lifupu lya zahabu kulawa Sheba,

wantu wamluwiri kwa Mlungu mashaka goseri,

na kumfilira tekelera paliwala poseri.

16 Isi ilaviyi viboga kwa uvuwa,

vigongu vimemi mabenangu.

Mabwajubwaju gakuyi gaherepi handa ga Lebanoni.

Na wantu wa kumjini wastawi handa ntundu.

17 Litawu lyakuyi nalyaluwika mashaka goseri,

zyuma zyakuyi zilikali handa mshenji.

Kupitira litawu lyakuyi maisi goseri gatekelerwi,

wantu woseri hawamshemi mtekelerwa!

18 Kakwiswi Mtuwa Mlungu, Mlungu gwa Israeli,

mweni gweka yakuyi yakatenda mauzauza.

19 Litawu lyaku liweru na lizyumwi mashaka goseri,

uweru wakuyi umemi pasipanu poseri!

Amina, Amina

20 Upeleru wa maluwa ga Daudi, mwana gwa Yese.