1 Nimheperiti Mtuwa Mlungu kwa uhepelera,

yomberi kapikinira kulira kwangu.

2 Kambusiyiti mulilindi lya mbulagu,

kandaviyiti mumadika ga kutyerebuka,

kang'olosiya poneka pampindi pa litalabuhi

na kugangamaziya maleka gangu.

3 Kanfunditi lwimbu lwasyayi,

lwimbu lwa zyuma kwa Mlungu gwetu.

Wavuwa hawawoni na kutira na kumtumbira Mtuwa Mlungu.

4 Mbaka muntu yakamtumbira Mtuwa Mlungu,

muntu yakawatumbirandiri wantu yawaliwona,

pota wantu yawayowera mpayu.

5 Gwee Mtuwa Mlungu, Mlungu gwangu, gutenda mirandu ivuwa yayiwalangikandiri,

gutenda mirandu yakulikangasha kwa twenga, kwahera yakaweza kuyilewelera.

Hambweri na kuyitakula,

kumbiti gavuwa nentu kugatambira.

6 Gwenga gufiriziwitindiri na tambiku na malaviwu,

tambika za kulunguziya wankanyama pota za kuwusiya vidoda guzifirandiri,

kumbiti gunupa makutu nikupikiniri.

7 Shakapanu ntakuliti, "Nakala,

kugatenda yagalembitwi mushitabu sha lagiru,

8 Gwee Mtuwa Mlungu,Mlungu gwangu, kutenda mafiru gaku, ndo nemeleru yaneni,

lagiru yaku niyikola kwa moyu gwangu goseri!"

9 Ntamba visoweru viheri vya ukombola,

kulongolu kwa lijojoniku likulu lya wantu.

Ntambu yaguvimana gwee Mtuwa Mlungu,

neni nililewelerandiri kuvibwera visoweru vyaku.

10 Ndekandiri kutakula mirandu yaku ya haki,

mbwera mashaka goseri kuwera gwenga ndo mlopola mwaminika,

niligambiriti lijojoniku likulu lya wantu visoweru vya uheri waku na waminika waku.

11 Gwee Mtuwa Mlungu, naguleka kumonera lusungu lwaku!

Ufiru waku na uwaminika waku vintula weri mashaka goseri.

12 Zyengetwa na ntabiku zaziwalangikandiri,

makontola gangu gangibikira ata wezandiri kuwona,

ndogavuwa kuliku mvili kumtuwi gwangu,

naneni twezukamoyu.

13 Gwee Mtuwa Mlungu nikuluwa gundopoli,

gwizi kalongola kuntanga.

14 Yawafira kundaga waweri na soni na wasoniziwi!

Awa yawafira ntenduwi,

wawuyi kumbeli na kusonizika.

15 "Awa yawanonganga

na wasoniziki kwa kusinda kwawu."

16 Kumbiti woseri walii yawakusakula wanemeleri

na kufyapilira toziya ya gwenga.

Yawafira ulopola waku,

walongi mashaka goseri, "Mtuwa Mlungu ndo Mkulu!"

17 Gwee Mtuwa Mlungu neni namhushu na nahera shintu,

kumbiti gwenga guntulaweri.

Gwenga ndo utanga wangu na mlopola gwangu,

gwizi, nagukawira!