1 Gwee Mlungu, nagulikala jii!

Gwee Mlungu nagunyamala, pota kulikala hera!

2 Guloli! Wankondu waku wankutenda ndewi,

yawakukalalira wakala kukugalambuka.

3 Wapanga vidoda vyakuwatendera wantu waku;

walitakuziyana kuhusu wantu awa yaguwashera.

4 Walonga, "Mwizi tuyiyagamiziyi isi yawu,

su litawu lya Israeli naliholwa kayi."

5 Wajimirana kwa moyu gumu,

watenda lipatanu kuusu gwenga.

6 Wantu wa Edomu na Waishimaeli,

Wamoabu na wantu wa Hagari,

7 wantu wa Gebali, Amoni na Amaleki,

wantu wa Filisti na wenikaya wa Tiru.

8 Ata Ashuru yapamuhera na womberi,

iwatanga wiwuka wa Lutu!

9 Guwatenderi ntambu yaguwatenditi wantu wa Midiyani na

ntambu yaguwatenditi Sisera na Yabini mlushemba kishoni,

10 wantu yaguwalagiti kulii Endori,

wawera handa wolera muisi.

11 Guwatendi wakulu wawu handa Orebu na Zeebu,

wakolamlima wawu woseri handa Zeba na Salmuna,

12 Weni walongiti, "Hatuyitori isi ya Mlungu yayina maliwuziwu."

13 Gwee Mlungu gwangu, guwagulusiyi handa lidiku mu shivyulavyula,

Handa miwawi yayigulusiwa na lyega.

14 Handa motu ntambu yagulunguziya lidowi,

handa limbamba ntambu yalilunguziya migongu,

15 guwatugiziyi awa kwa lipuga lyaku,

na kuwatiliziya kwa lyega lyaku likulu.

16 Guvimemiziyi vyenu vyawu soni,

wapati kukusakula, gwee Mtuwa Mlungu.

17 Wasoniziwi na kufezeeka mashaka goseri,

waagamiziwi nakamu kwa soni.

18 Wavimani kuwera gwenga gwekayaku

litawu lyaku Mtuwa Mlungu,

ndo Mlungu Mkulu pasipanu poseri.