1 Mlongi mayagashii kwa Mtuwa Mlungu, toziya ndo mheri,

toziya ufiru wakuyi ulikala mashaka goseri.

2 Wantu wa Israeli na walongi,

ufiru wakuyi ulikala mashaka goseri.

3 Wiwuka wa Aruni na walongi,

ufiru wakuyi ulikala mashaka goseri.

4 Woseri yawamguwira Mtuwa Mlungu na walongu,

ufiru wakuyi ulikala mashaka goseri.

5 Paweriti muntabiku nimluwiti Mtuwa Mlungu,

nayomberi kampikana na kuntula lekeru.

6 Mtuwa Mlungu kapamuhera naneni, hapeni ntiri shintu,

muntu hakantendi shishi?

7 Mtuwa Mlungu kapamuhera naneni, kuntanga;

naneni haniwawoni wankondu wangu pawasinda.

8 Mbaka kutugira uponera kwa Mtuwa Mlungu,

kuliku kumtumbira muntu.

9 Mbaka kutugira uponera kwa Mtuwa Mlungu,

kuliku kuwatumbira wakulu.

10 Maisi goseri gazyengetiti,

kumbiti kwa litawu lya Mtuwa Mlungu hanigaamizi!

11 Gazyengekiti kila uwega,

kumbiti kwa litawu lya Mtuwa Mlungu, hanigagamizi!

12 Gazyengekiti handa wanjuki,

kumbiti galunguliti handa ntundu mumotu,

kwa litawu lya Mtuwa Mlungu hanigaagamizi!

13 Nkomangitwi nentu sambira nsindi,

kumbiti Mtuwa Mlungu kantangi.

14 Mtuwa Mlungu ndo likakala lyangu na lwimbu lyaneni,

yomberi ndo ulopola waneni.

15 Maziwu ga nemeru ya ukanka gapikinirika mnumba mwa waminika,

pawimbiti, liwoku lya Mtuwa Mlungu litenda mirandu mikulu!

16 Liwoku lya likakala lya Mtuwa Mlungu lijega ukanka!

Liwoku lya Mtuwa Mlungu litenda mirandu mikulu!

17 Hapenihowi ila hanilikali,

su nigatambi matendu makulu ga Mtuwa Mlungu.

18 Mtuwa Mlungu kankomanga nentu,

kumbiti kandekandiri howi.

19 Mumvuguliliri migomi ya haki,

ningiri na kulonga mayagashii Mtuwa Mlungu!

20 Ali ndo ligomi lya Mtuwa Mlungu,

wantu waminika hawapitiri amu.

21 Gwee Mtuwa Mlungu hanongi mayagashii toziya gunankula,

gwenga ndo ulopola waneni.

22 Libuhi lyawalilemiti wanyawa wa numba,

vinu liwera libuhi likulu lya kushisoku.

23 Aga ndo mahengu gakuyi Mtuwa Mlungu

na geni ndo ga kulikangasha nentu kwatwenga.

24 Ali ndo lishaka lyakalitenditi Mtuwa Mlungu,

tunemeleri na kufyapilira.

25 Gwee Mtuwa Mlungu shondi gutulopoli!

Gwee Mtuwa Mlungu shondi gutupanani mpatiru!

26 Katekelerwi ayu yakiza kwa litawu lya Mtuwa Mlungu!

Hatuwatekeleri kulawa ukaya kwa Mtuwa Mlungu

27 Mtuwa Mlungu ndo Mlungu,

yomberi katupanana kulangala kwakuyi

Mkoli ntambi mumawoku mwenu mwingiri mumsambu,

pamlilongoziya mpaka mumagoli ga shitalawanda.

28 Gwenga ndo Mlungu gwangu naneni hanongi mayagashi,

gwee Mlungu gwangu hanikukwisi.

29 Mlongi mayagashi kwa Mtuwa Mlungu kwakuwera ndo mheri,

kwa mana ufiru wakuyi ndo wa mashaka goseri.