1 Pahala paku pakulika paherepa nentu!

Gwee Mtuwa Mlungu gwa mashonta!

2 Moyu gwangu gufira nentu kulikala mungeleri zya Mtuwa Mlungu!

Moyu gwangu na nshimba ya neni vyoseri vimfyapilira Mlungu mkomu.

3 Viraa shomoru wapata pahala pawu pakulikala,

mbayuwayu wanyawa vitukulu vyawu,

pahala pawaweza kutula wana wawu, pakwegera na vitalawanda vyaku,

gwee Mtuwa Mlungu yagwana makakala, Mfalumi gwangu na Mlungu gwangu!

4 Mbaka walii yawalikala mu Numba mwaku,

pawimba zyuma mashaka goseri.

5 Mbaka walii yawapata makakala gawu kulawa kwa gwenga,

yawafira kuguwira kulugongu Sayuni.

6 Pawapita mululalanda luyuma lwa Baka,

walutenda kuwera pahala pa mbwiru,

na mvula zya kuyalira zimemiziya mashi.

7 Hawendereyi kupata likakala nentu,

mpaka wamwoni Mlungu kulugongu lya Sayuni.

8 Gwee Mtuwa Mlungu, Mlungu yagwana makakala goseri gumpikiniri kuluwa kwawu,

Gwee Mlungu gwa Yakobu gunyambiri likutu lyaku.

9 Gwee Mtuwa Mlungu gumtekeleri mfalumi gwetu yakawera lusegeyu lwetu,

gumloli kwa uheri mswagwa lipaki gwaku.

10 Lishaka limu mungeleri zyaku,

ndo liherepa kuliku mashaka elufu pahala pamonga,

mbaka kugoloka paligomi pa Numba yaku,

kuliku kulikala ukaya kwa wakontola.

11 Mana Mtuwa Mlungu ndo mshenji gwetu na litumbiru lyetu,

yomberi katupendereya na kutupanana uweru.

Hapeni kawimi shoseri shiheri,

walii woseri yawatenda gakafira.

12 Gwee Mtuwa Mlungu yagwana makakala,

mbaka muntu ulii yakakwamini gwenga!