1 Gwee Mtuwa Mlungu, gupikinili kuluwa kwa neni!

Gupikanili luwa yangu

toziya gwenga ndo yagwana haki,

gunankuli toziya ya waminika waku.

2 Naguntoza neni ntumintumi gwaku,

toziya kwahera yoseri yakawera mkomu kana haki kulongolu kwaku.

3 Wankondu wa wangu wanfata,

wankusiya pasi nakamu,

wankaliziya kuluwindu handa muntu yakahowiti makashu.

4 Twezuka moyu,

rohu yangu isintuka toziya ya lyoga.

5 Nilihola mashaka gapititi,

nilihola goseri gagutenditi,

nigalola weri matendu gaku.

6 Nyasula mawoku gangu kukuluwa,

nana yumiluwa yangu handa isi iyuma yayahera mashi.

7 Gwee Mtuwa Mlungu, gunankuli kalongola,

toziya moyu gwangu gutoka!

Nagulififa kutali na neni,

naniza kuwera handa walii yawaselera kwa wantu yawahowiti.

8 Mandawira gunanguziyi ufiru waku,

mana nikutumbira gwenga.

Gunanguziyi njira ya kufata, toziya nikutumbira gwenga.

9 Gwee Mtuwa Mlungu, gundopoli, kulawa kwa wankondu wangu,

toziya kwa gwenga nilififa.

10 Gunfundi kutenda gagufira,

toziya gwenga ndo Mlungu gwangu!

Rohu gwaku muheri kanonguziyi muisi lalanda.

11 Gwee Mtuwa Mlungu, toziya ya litawu lyaku gulopoli ukomu wangu,

kwa haki gumbusiyi mukutabika.

12 Kwajili ya ufiru waku kwaneni, guwalagi wankondu wangu,

guwagamiziyi nakamu yawantabisiya,

toziya neni na ntumintumi gwaku.