1 Gwee Mtuwa Mlungu, gwenga gundolandola na kumana.

2 Gwenga gumana kulikala na kugoloka kwa neni,

guvimana kulawa kutali kila shintu shanishiholera.

3 Guvimana kutyanga kwangu na kugonja kwangu,

gwenga guvimana matendu gangu goseri.

4 Pamberi haneni takuli shisoweru shosheli,

gwenga Mtuwa Mlungu, guvimana goseri.

5 Gwenga guzyengeta kulongolu na kumbeli,

gundolera na likakala lyaku.

6 Umani waku upita mahala gangu,

ndo makulu nentu, wezandiri kugamana.

7 Ng'endi koshi kweni rohu yaku kwahera?

Ntugili koshi kweni gwenga kwahera?

8 Pankwena kumpindi, gwenga gwakulaa,

paniligonjeka pasi kwa yawahowiti,

gwenga gwakulaa.

9 Panguluka mpaka kwagulawa mshenji,

mpaka upeleru wa bahari,

10 ata aku gwakulaa kunongiziya,

makakala gaku hagantangi.

11 Ata panonga luwindu lunfifi,

na kulangala kugalambuki kuweri pashiru,

12 Kwa gwenga luwindu lukufifandiri,

na pashiru pamulika handa paluwala,

kwa gwenga luwindu ndo handa kulangala.

13 Gwenga guviwumbiti viwungiru vyangu vya mngati,

gunkolaniziya mumtima mwa mawu gwangu.

14 Nonga mayagashi toziya neni gwakulikangasha,

na matendu gaku ndo ga mauzauza

na neni gumana nakamu.

15 Mihonju yangu ififakandiri kwaku

shaka pawumbitwi kwa bada.

Shaka pawumbitwi kwa kunkolanila mumashi matali.

16 Gwenga gumoniti pamberi haneni niwuki,

gulembiti mashaka gangu mushitabu shaku,

pamberi pa kuwera mashaka aga.

17 Gwee Mlungu, yaguholela neni ndo makulu.

Gawezandiri kuwalangika.

18 Menigawalangi megaweri gavuwa kuliku mhanga.

Panimkaku na pamuhera na gwenga.

19 Gwee Mtuwa Mlungu, nfira meguwalagi wakontola!

Muwuki kwa neni mwega walagaji.

20 Womberi walonga madoda kwa gwenga,

waligiranga litawu lyaku.

21 Gwee Mtuwa Mlungu, si niwakalalira yawakukalalira?

Si niwabeza nentu walii yawakugalambuka?

22 Niwakalalira nentu yawakukalalira,

wankondu waku ndo wankondu waneni.

23 Gwee Mlungu gundolindoli na gugumani moyu gwangu,

gunjeri na gugamani maholu gangu.

24 Gundoli mngati mwaneni guwoni handa kwana shikontola,

gunonguziyi munjira ya mashaka goseri