1 Gwee Mtuwa Mlungu, gupikaniri kuluwa kwaneni kwa haki,

gupikanili kulira kwangu,

guyambili likutu gupikaniri luwa yangu yahera mpayu.

2 Haki yaneni ilawi kwa gwenga,

toziya gwenga guvimana mrandu yaguwera gwa teratera.

3 Gwenga guvimana nakamu moyu gwangu.

Gunizira pashiru kundolandola na kunjera

kumbiti guwonandiri ukontola mngati mwaneni na

nandulandiri shintu shashifaandiri,

4 kwa vitwatira vyawatenda wantu.

Neni nigajimira malagaliru gaku,

nfatandiri njira ya wanamtiti.

5 Nfata njira yaku mashaka goseri,

pota magulu gangu gakoserandiri njira.

6 Gwee Mlungu, nikuluwa, toziya gunankulaga,

gunyambili likutu, guvipikiniri visoweru vyangu.

7 Gulanguziyi matendu gaku makulu ga kulikangasha,

guwalopoli kulawa kwa wankondu wawu,

wali yawatugira uponera kwa gwenga,

8 Gundoleri gambira shiligiligi sha lisu,

gunfifi palisisi lya mpapatiru zyaku,

9 kulawa mu makomangu ga wakontola,

kutali na wankondu waneni yawazyengeta,

10 awa wahera lusungu loseri mumoyu, wamema visoweru vya kulidumba.

11 Wanfata na kunzyengeta,

wangwadira su wangusiyi pasi.

12 Wakala kumpapula gambira simba,

handa mwana gwa simba yakagwadira nkanyama.

13 Gwee Mtuwa Mlungu, gugoloki gulikomangi nawa na guwakanki,

kwa ligumba lyaku gundopoli kutali na wakontola.

14 Gwee Mtuwa Mlungu, gundopoli mmawoku mwa wantu awa,

weni mpatiru yawu pasipanu hera.

Wanemeleriti ulunda wawu

mana guwapanana ulunda uvuwa,

weni wawalekera wana wawu

vilavirii hawusigali kwa wazukuru wawu.

15 Kumbiti neni hanishiwoni sheni shaku, toziya ntenda shashikufiriziya gwenga,

panimuka hamemi nemeru kwa kukuwona.