1 Mtuwa Mlungu kakwankuli paguwera mkutabika,

litawu lya Mlungu gwa Yakobu likuloleri.

2 Kakujegeri utanga kulawa Kuhekalu lyakuwi,

kakutangi kulawa lugongu Sayuni.

3 Kaziholi tambiku zaku zoseri

na kazijimiri tambika zaku za kulunguziya.

4 Kakupanani gagufira mumoyu mwaku,

nakafanikishi goseri galii gagufira kutenda.

5 Hatunemeleri toziya ya ukanka waku,

hatunyasuli bendera kulikwisa litawu lya Mtuwa Mlungu gwetu.

Mlungu kakutenderi goseri galii gagumluwa!

6 Vinu nivimana Mtuwa Mlungu hakamtangi mfalumi yakamsyaguliti,

hakamwankuli kulawa pananagala pakuyi kumpindi,

kwa makakala gakuyi hakampanani ukanka mkulu.

7 Wamonga walitumbira mbutuka za nkondu na wamonga farasi,

Kumbiti twenga tulitumbira Mtuwa Mlungu, Mlungu gwetu.

8 Womberi walikwala na kuguwa,

kumbiti twenga hatwimuki na kugoloka ugangamala.

9 Mtuwa Mlungu, gumpanani ukanka mfalumi,

gutwankuli shaka patukushema.