1 Mlungu gwa likakala, Mtuwa Mlungu, kalonga,

kawashema yawalikala pasipanu,

kulawa kwagulawa mshenji mpaka kwaguzyeta.

2 Kulawa Sayuni,

lushi luherepa nentu, Mlungu kankulilaviya, pakawawalira.

3 Mlungu gwa twenga kankwiza jiyajiyandiri,

motu yagulunguziya gumlongolera,

lipuga likalipa limzyengeta.

4 Kulawa kunani kazishema mpindi na pasipanu

ziloli pakawatoza wantu wakuyi.

5 Mjojoniri kwaneni wantu waminika,

yawatenditi lipatanu na neni kwa tambiku.

6 Mpindi zibweri umanika wa Mlungu,

handa Mlungu mweni ndo mtoza.

7 "Mpikiniri wantu wa neni shantakula!

Israeli handaviyi kwaku ukapitawu wa kukusitaki.

Neni ndo Mlungu, Neni ndo Mlungu gwanu.

8 Nikukalipirandiri toziya ya tambiku zaku,

mana hagweneleki kulavalira tambiku za kulungiziya.

9 Nakaka nfirandiri ng'ombi shipalu gwa shisasa shaku,

pota pongu gwa mifugu yaku,

10 toziya wankanyama woseri wa kuntundu ndo lunda yangu,

na maelufu ga migongu na wang'ombi ndo waneni.

11 Wampongu woseri wa kumigongu niwamana,

na viwumbi wakomu woseri mumalambu ndo vya neni.

12 Handa panana njala menikugambilindiri gwenga,

toziya pasipanu na vyoseri vyaviwera ndo vya neni.

13 Hashi, gulishera ndiya vinofu vya ng'ombi shipalu

ama kulanda mwazi gwa mbuzi?"

14 Mayagashii iweri ndo tambiku yaku kwa Mlungu,

gumtenderi Mlungu shagulongiti hagushitendi.

15 "Gunshemi shaka sha kutabika,

na neni hanikulopoli,

na gwenga hagumpanani ligoya."

16 Kumbiti Mlungu kamgambira muntu mkontola,

hashi kuzikanta hera lagiru za neni?

Ntambu gaa guyowerayowera kwaajili ya lipatanu lya neni?

17 Gwenga gukalalira kuwera njimiru,

na visoweru vya neni gugafirandiri kugafata.

18 Pagumwona mwivi gulikola nayu,

na wahumba guwera nawa.

19 Gwakala mashaka goseri kulonga vidoda,

na lulimi lwaku lutakula mpayu.

20 Gukalapasi kumlongalonga muyagu

yina, kumshongera mlongu gwaku gamweni.

21 Shaka gwakutenda vyoseri avi na neni nyamalira

hashi gulishera nakaka neni ndo handa gwenga?

Kumbiti vinu nikukalipira,

na hanikusitaki pota kufifa.

22 Mliholi weri mlandu agu, mwenga yamnsherandiri,

hera hangu haniwangamiziyi,

potakuwera muntu gwakuwalopola.

23 Yakalonga mayagashii kwaneni handa tambiku yakuyi, ayu ndo yakanupa ligoya,

yoseri yakajimira lagiru zyangu, ayu ndo hanimlopoli.