1 Nakaka, Mlungu ndo mheri kwa Israeli,

kwa walii yawawera na mumiyoyu iherepa.

2 Kumbiti kwa neni weriti pakwegera kulikwala,

shididini hera mentyerebuki,

3 toziya nfiriti kuwera handa wanamtiti,

pamoniti wamota kwa kutenda vidoda.

4 Mana wantu awa waheriti ntabiku,

toziya nshimba zawu zyana afiya na wana makakala.

5 Wapatandiri ntabiku zyaziwapata wantu wamonga,

wapatandiri makomangu handa wantu wamonga.

6 Hangu mtiti guwera handa ukufu wawu msingu,

unkondu ndo handa nguwu yawu.

7 Ukontola ulawa mumiyoyu ya hawa yawanenepiti,

mipangu idoda ilawa mu mahala mwawu.

8 Wawajongera wamonga na kulonga madoda,

walitumba na kupanga kuwawonera wamonga.

9 Kwa milomu yawu wigiranga mpindi,

kwa milimi yawu wakolamlima pasipanu,

10 ata wantu wa Mlungu wafata shawatenda,

na kwamini kila shawatakula.

11 Walonga, "Mlungu hakavimani hashi!

Mlungu mkulu hapeni kawezi kuyambula."

12 Hangu ndo wantu wakontola ntambu yawawera,

wana kila shintu na wendeleya kupata lunda nentu.

13 Nakaka, nigatula mumoyu mwangu hera

nawa mawoku gangu pota toziya.

14 Paluwala poseri mpata makomangu,

kila mandawira mpata ntabiku.

15 Handa mentakuli handa womberi,

meweri mgalambuka muwamu mwa wantu waku.

16 Panjeriti kuvimana mirandu ayi

iweriti ikamala kwa neni,

17 mpaka paningiriti pananagala pa Mlungu.

Ndo panivimaniti mpeleru zyawu.

18 Nakaka gwenga haguwatuli pahala patyelebuka,

guwatenda waguwi na kwagamira.

19 Guloli ntambu yawagamiziwa vumu

na kuwusilirwa kutali kwa vitiriziwu.

20 Handa muntu yakalota mandawira,

gwee Mtuwa, pagugoloka womberi hawawusiwi katepu.

21 Moyu gwangu gutenditwi

shaka paweriti na utama murohu,

22 weriti pukapuka na mzigizigi,

weriti handa kanyama kulongolu kwaku.

23 Ata hangu napamuhera na gwenga,

Gunkola liwoku lyangu lya kumliwu.

24 Gwenga gunonguziya kwa magambiziwu gaku,

upeleru hagunanki kwa ligoya.

25 Gaa yawera nayu kumpindi ila gwenga?

Na pasipanu kwahera shanfira ila gwenga!

26 Nshimba na moyu gwangu guweza kusinda,

kumbiti Mlungu, ndo likakala lya moyu gwangu,

na yomberi ndo kila shintu shanfira mashaka goseri.

27 Yawalitula gweka na gwenga, nakaka hawagamiri.

Haguwalagi woseri yawawerandiri waminika.

28 Kumbiti kwaneni mbaka kuwera pakwegera na Mlungu,

nimtenda Mlungu kuwera tugira yangu.

Naneni hambweri vitwatira vyoseri vyagutenditi!