1 Gwee Mtuwa Mlungu, nonga mayagashii kwa moyu gwangu goseri,

hanikwimbili zyuma kulongolu kwa wamlungu.

2 Hansuntamali kulola Numba Nkulu yaku nananagala,

hanilizyumi litawu lyaku kwajili ya ufuiru waku na waminika waku,

toziya gutenda shisoweru shaku na litawu lyaku kuwera vikulu kuliku vintu vyoseri.

3 Panikuliliriti, gwenga gunankuliti,

gunongeriti makakala gangu.

4 Wafalumi woseri pasipanu hawakuzyumi gwee Mtuwa Mlungu,

toziya wavipikinira visoweru vyaku.

5 Wimbi zyuma za matendu gaku,

gwee Mtuwa Mlungu, toziya uweru waku ndo mkulu.

6 Tembera Mtuwa Mlungu gwakumpindi,

guwashera yawahera makakala,

na yawana mtiti guwawona kulawa kutali.

7 Pawera muntabika,

gwenga gundolera,

gulitapisiya liwoku lyaku lya kumliwu,

kundopola kwa wankondu wangu yawankalalira.

8 Gwee Mtuwa Mlungu, hagumpuziliri goseri gantendiritwi.

Gwee Mtuwa Mlungu ufiru waku wa mashaka goseri,

nagulyaluwa lihengu lya mawoku gaku.