1 Gwee Mlungu gumoneri lusungu,

toziya ya ufiru waku,

kulinganira na uvuwa wa lusungu lwaku guwusiliri kutali vidoda vyangu.

2 Gungululi nakamu ukontola wangu,

guvitakasiyi vidoda vyangu.

3 Njimira nakaka makosa gangu,

mashaka goseri mona lupalahera makontola gangu.

4 Nikutendera vidoda gwenga gweka yaku,

Ntenda madoda palongolu paku,

shagwamuwiti gwenga ndo sha nakaka

toza yaku yahera lawama.

5 Neni nkoseya kwanjira kwiwuka kwangu,

nana vidoda kwanjira mumtima mwa mawu gwangu.

6 Gwenga gufira uwaminika kulawa mngati,

hangu gunfundi luhala lwalufifikiti.

7 Guntakasiyi kwa mivumbeza, ntakati,

gungululi weri mfufu mbuu handa seluji.

8 Guntendi nemeleri na kufyapilira,

gunemiziyi kayi, neni yagumbosholangiti

9 Gugalambuki, naguvilola vidoda vyaneni,

gugafuti makontola gangu goseri.

10 Gwee Mlungu guwumbili moyu guherepa,

gutuli mngati mwaneni rohu yasyayi ya waminika.

11 Nagunasa kutali nagwenga,

nagumbusilira rohu gwaku mnanagala,

12 Gumbuziliri nemeleru ya ulopola,

gumpanani moyu gwa kujimira su guntedi nendeleyi kukujimira.

13 Panu haniwafundi yawatenda vidoda njira zako,

na wana vidoda hawawuyi kwa gwenga.

14 Gwee Mlungu gundopoli kwa kundekaziya likosa lya kwita mwazi,

gwee Mlungu, mlopola gwangu,

naneni kwa nemeru hanimbi kwa kubotanga, toziya ya haki yaku.

15 Gwee Mtuwa Mlungu guntangi kutakula,

su neni mbweli zyuma zyaku.

16 Nakaka gwenga gufiriziwandiri na tambiku hera,

handa meyiweri hangu neni menikulaviliri,

gwenga gufirandiri tambika za kulunguziya.

17 Gwee Mlungu tambiku ya neni kwa gwenga, ndo moyu mnanaga,

gwenga gulemandiri moyu gunanaga na gwa kulonga noya vidoda.

18 Gwee Mlungu, gufiri kulutendera maheri lushi lwa sayuni,

guvinyawi kayi vibambaza vya lushi lwa Yerusalemu.

19 Panu hagufiriziwi na tambiku za nakaka,

tambiku za kulunguziwa na tambiku za kulunguziwa yoseri,

shakapanu ng'ombi shipalu hawalaviwi tambiku pakutambikira paku.