1 Gwee Mtuwa Mlungu, nagunkalipira kwa maya gaku,

nagunkomanga kwa nkalaliru yaku,

2 Gumoneri lusungu, Gwee Mtuwa Mlungu, mperuwa makakala,

gwee Mtuwa Mlungu, gumponiziyi ndwala mpaka kumihonju.

3 Nshanshatika nentu mumoyu mwa neni.

Gwee Mtuwa Mlungu, hagukawawiri mpaka ndii?

4 Gundoli, gwee Mtuwa Mlungu, gundopoli,

gumponiziyi kwa ufiru waku mkulu.

5 Aku kwa wahowiti kwahera yakakuhola,

aku kumambi ndo gaa yakaweza kulonga maya ga shii?

6 Ntoka kulira kwa utama,

pashiru poseri ndoviya shitanda shangu kwa masozi,

kwa kulira kwa neni msagamu gwangu gulowa.

7 Masu gangu gatoka kwa kuhinginika,

gawera masheri toziya ya wankondu.

8 Muwuki kwa neni woseri yamutenda makontola!

Toziya Mtuwa Mlungu kapikinira kulira kwa neni.

9 Mtuwa Mlungu kapikinira luwa yaneni yakuluwa kamoneri lusungu,

Mlungu kajimira maluwa ganeni.

10 Wankondu waneni woseri hawasoniziki na kwinginika,

hawawuyi kumbeli na kusoniziwa vumu.