1 Vidoda viyowera na muntu mkontola, mngati mwa moyu mwakuyi,

mlandu gwa kumguwira Mlungu kwahera nakamu kwakuyi.

2 Mkontola kalipendeleya mweni,

kalihola handa Mlungu hapeni kavimani na kupangirwa.

3 Kila shakatakula ndo ukontola na mpayu,

kalisherandiri mirandu ya luhala na kutenda maheri.

4 Kapanga makontola pakawera mushitanda,

kalitula mumakaliru ga kutenda vidoda,

pota kalekanandiri na ukontola.

5 Gwee Mtuwa Mlungu ufiru waku wa mashaka goseri ueneya kumpindi,

uaminika waku usoka kumawundi.

6 Uwaminika waku ndo handa migongu mitali,

toza zaku ndo handa matiwa ga bahari.

Gwee Mtuwa Mlungu, guwaloleri wantu na wankanyama.

7 Ntambu gaa yawuwera ukulu ufiru waku!

Ata wantu watugira kulisisi lya mbapatiru zaku.

8 Guwatenda wikuti kwa lunda za numba ya gwenga,

guwalandaziya kulawa lushemba lwa uheri waku.

9 Gwenga ndo shanjiru sha ukomu,

kwa lulangala lwaku twenga tuwoni.

10 Gwendereyi kuwafira walii yawakumana,

gwendeleyi kuwera mheri kwa waaminika.

11 Nagujimira wanamtiti wankanki,

pota wantu wakontola wantugiziyi.

12 Guloli yawatenda makontola waguwa,

wagusiwa pasi, wawezandiri kugoloka.