1 Mumzyumi Mtuwa Mlungu!

Mumzyumi Mtuwa Mlungu kulawa kumpindi,

mumzyumi kulawa aku kumpindi.

2 Mumzyumi, mwenga wantumintumi wakuyi woseri wa kumpindi,

mumzyumi, mwenga wamashonta wakuyi woseri.

3 Mumzyumi, mwenga mshenji na lyezi,

mumzyumi, ntondu zoseri zyazing'erengeta,

4 mumzyumi, mwenga mpindi za pampindi,

na mashi yagawera pampindi pa mpindi.

5 Vyoseri vilizyumi litawu lya Mtuwa Mlungu,

toziya viwumbitwi kwa lagaliru yakuyi.

6 Yomberi kashituliti kila shintu pahala pakuyi mashaka goseri,

kwa lagiru lyayiwezandiri kugalambulwa.

7 Mumzyumi Mtuwa Mlungu kulawa pasipanu,

mwenga viwumbi vikulu vya bahari na mumashi matali, mumzyumi Mlungu.

8 Mwenga mpanta, mvula ya mabuwi na seluji mumzyumi,

lyega lyalivuma kwa lagalira yakuyi,

9 mumzyumi mwenga vigongu na vidunda,

mitera ya mabwajubwaju na miyerezi,

10 mmuzyumi mwenga wakanyama wa kuntundu na wakufuga,

viwumbi yavikwawakwawa na wampongu woseri,

11 mumzyumi mwenga wafalumi na wantu woseri pasipanu,

walonguziya na wakolamilima woseri pasipanu,

12 mumzyumi mwenga wantemba na wahinga,

wazewi woseri na wana,

13 mwawoseri mlizyumi litawu lya Mtuwa Mlungu,

mana litawu lyakuyi gweka yakuyi ndo likulu nentu,

uweru wakuyi panani pa pasipanu na kumpindi.

14 Kawapanana wantu wakuyi makakala,

ligoya kwa wananagala wakuyi woseri,

wantu wa Israeli yakawafira.

Mumzyumi Mtuwa Mlungu!