1 Gwee Mlungu, tupikinira kwa makutu getu

Wazewi wetu watutambira,

mirandu yaguyitenditi mashaka gawu

yina, mirandu yagutenditi makashu.

2 Kwa liwoku lyaku mweni guwawingiti maisi gamonga

na pahala pawu guwatula wantu waku,

gugakomangiti maisi gamonga,

na kuwapanana mpatiru wantu waku.

3 Wantu waku wayitolandiri isi kwa mgowa gwawu,

pota kupata ukanka kwa makakala gawu,

ila guwaponiziyiti kwa makakala gaku na uwezu waku na kujimirwa kwawu,

kwa kuwawalira sheni shaku,

toziya gwenga guwafiriti.

4 Gwenga ndo mfalumi gwangu na Mlungu gwangu!

Guwapanana ukanka wiwuka wa Yakobu.

5 Kwa likakala lyaku twawakanka wankondu wetu,

na kwa uwezu waku tuwatimbanga yawatulema.

6 Neni niutumbirandiri upindi wangu

pota ligumba lyangu liwezandiri kundopola;

7 kumbiti gwenga gutulopoliti na wankondu wetu,

guwavulugiti walii yawatukalaliliti.

8 Mashaka goseri hatukuzyumi, gwee Mlungu,

hatulongi mayagashi mashaka goseri.

9 Kumbiti vinu gutuleka na kutusoniziya,

gugendandiri kayi pamuhera na mashonta getu.

10 Gututenda tuwatili wankondu wetu,

na womberi wazilopola lunda zetu.

11 Gututenda gambira kondolu yawajegwa kulikitulwa,

gutupalasiya pakati pa maisi gamonga.

12 Guwashuwuza wantu waku kwa beyi ndidini,

pota kukosilila kupata shikulu.

13 Gututenda kuwera lijonga kwa wapakwegera wetu,

na womberi watujongeri na kutuseka.

14 Gututenda tubeziwi na wantu wa maisi,

wahenga wankutikisiya mituwi yawu kwa kutubeziya.

15 Paluwala poseri wera na fezeya,

nasheni shangu shimema soni nentu,

16 kulawilana na kupikanira beziya yawu na mahigirangu,

kwa kulikoma na wankondu wangu yawambuzilira.

17 Goseri aga gatupata twenga,

tembera twenikulyaluwi

pota hatweni megi lipatanu lyaku. 18 Tulekandiri kuwera waaminika kwa gwenga,

pota kuzileka njira zaku.

19 Ata hangu gutuleka pota kututanga pakati pa wamamihi,

viraa gutuleka muluwindu lukulu.

20 Metuweri tukulyaluwa gwenga Mlungu gwetu

metumutugiri mlungu gwa mpayu,

21 gwee Mlungu guvimani kala mlandu agu,

toziya gwenga guzimana bada za mmoyu.

22 Kumbiti toziya yaku sambira tuhowa kila lishaka

tutenderwa handa wakondolu yawajengwa kulikitulwa.

23 Gwee Mtuwa gwimuki! Mbona gugonja?

Shondi! Gugoloki nagutwasa mashaka goseri!

24 Mbona gulififa kutali na twenga?

Na kulyaluwa uhushu na ntabika ya twenga!

25 Tusuntamala mpaka mlidikudiku,

tulinatila na litapaka.

26 Shondi! Gugoloki gwizi kututanga!

Gutulopoli toziya ya ufiru waku.