1 Gupikiniri visoweru vyaneni, Mtuwa Mlungu,

gupikaniri ntambu yandaya.

2 Gupikiniri kulira kwaneni,

Mfalumi gwangu na Mlungu gwangu,

toziya gwenga ndo yanikuluwa.

3 Gwee Mtuwa Mlungu, mandawira putiputi gulipikinira liziwu lyangu,

mandawira njega maluwa

shakapanu hepelera gunankuli.

4 Gwenga gwa Mlungu yagufirandiri udoda,

kwagwenga mkontola hapeni kalikali.

5 Yawana mtiti wafiruwandiri kulongolu kwaku,

gwenga guwakalalira woseri yawatenda makontola.

6 Haguwalagi woseri yawatakula mpayu,

guwakalalira yawalaga na wapayira.

7 Kumbiti kwa utanga waku mkulu neni,

hanizi mnumba mwaku,

kwa unanaga, hanikuguwiri Kuhekalu laku linanagala,

8 Gunonguziyi ntambuyagufira, gwee Mtuwa Mlungu, toziya wankondu wangu wankuhepera kunkomanga,

njira yaku guyituli luparahera kulongolu kwaneni.

9 Mumilomu mwawu mwahera unakaka,

mumiyoyu mwawu wamema mahalabisiwu,

makulumiru gawu ndo handa lisembi lya lupalahera,

milimi yawu imema uzyanga.

10 Guwakomi kwa vidoda vyawu gwee Mlungu,

wabatwi kwa migomiziwu yawu weni,

guwawingili kunja kwa vidoda vyawu vivuwa,

toziya wakugalambuka gwenga.

11 Kumbiti wanemeleri woseri yawatugira uponeru waku,

wimbi kwa nemeru mashaka goseri.

Guwaloleri waminika waku,

su wanemeleri.

12 Mana gwee Mtuwa Mlungu nakaka guwatekelera waminika,

gwawashinga kwa tanga zaku handa kwa lusegeyu.