1 Gwee Mlungu, gupikanili luwa ya neni, nagulola kumpeku panikuluwa.

2 Gumpikani na kunankula,

ntoka na ntabiku yangu.

3 Toziya nana lyoga kwa ntiriziwu zya wankondu wa neni,

na kwa kutabisiwa na wantu wakontola.

Wantu wakontola wankutabisiya,

kwa maya wantendera madoda.

4 Moyu gwangu gumema hinginika,

vitiliziwu vya kuhowa vimbabanika.

5 Nendemera kwa lyoga likulu,

nkangalwa na vitiliziwu vikulu.

6 Mpaka ntakula meweri na mpapatiru handa ng'unda!

Menguluki kutali nakoyeri,

7 yina, meng'endi kutali nentu,

na kulikala kushiwala.

8 Mentugili pahala pa kulififa,

patali na lyega likalipa na lipuga.

9 Gwee Mtuwa, Guwavuluvutira shawafira kutakula,

mana mona unkesera na ndewu mumji,

10 pavizyengeta pashiru na paluwala,

na kuumemiziya ukontola na madoda.

11 Uhalibisiya umema poseri kumji, pota uwukandiri,

ndewu na ntabiku zimema na ziwukandiri munjira zakuyi.

12 Handa mnkondu gwangu mekanigiri,

mewezi kuhepelera aga, handa mnkondu gwangu mekambeziyi,

mewezi kulififa kutali na yomberi.

13 Kumbiti ndo gwenga myangu,

ndo gwenga ganja gwangu gwapakwegera.

14 Twenga tuzoweleliti kuyowera shiganja,

mu shipinga tuweriti tulilonguziyana pamuhera kugenda ukaya kwa Mlungu.

15 Kuhowa kuwiziri vumu wankondu waneni,

wasuluki kuzimu wakali wakomu.

Mana ukontola umema mukaya mwamu na muwamu mwawu.

16 Kumbiti neni nimlilira Mlungu,

na yomberi Mtuwa Mlungu hakandopoli.

17 Mandawira na paluwala na pashimihi ndira kwa hinginika,

na yomberi hakalipikiniri liziwu lya neni.

18 Hakambuziyi poneka,

kulawa munkondu yanilikomangiti,

toziya ya wankondu wangu wavuwa.

19 Mlungu yakakolamlima mashaka goseri, mweni yakagalambukandiri

hakawapikiniri na kuwakomanga,

wantu yawagalambulandiri njira zyawu, pota kumtira Mlungu,

20 Myangu katalapisiya liwoku kawakomanga waganja wakuyi,

kamega mapatanu gakuyi na womberi.

21 Visoweru vyakuyi ndo vinama kuliku siyagi,

kumbiti maholu gakuyi ndo gakutenda nkondu.

Visoweru vyakuyi ndo vinama handa lipaki,

kumbiti vilikitula handa ligumba likalipa.

22 Gumlekeri Mtuwa Mlungu shisanka shaku,

na yomberi hakakuloleri,

nakamu hapeni kamleki mwaminika kasindi.

23 Gwee Mlungu, haguwasulusiyi kulirindi nakamu,

wantu awa yawalaga na wanampayu, awa hapeni wasoki ata nusu ya makaliru gawu.

Kumbiti neni hanikutumbiri gwenga!