1 Moyu gwangu gumema maholu maheri.

Nimtungira mfalumi lwimbu awu,

lulimi lwangu ndo handa kalamu ya mlemba yakamanika nentu.

2 Gwee guherepa kuliku wantu woseri,

visoweru vyaku ndo zyuma hera.

Hangu Mlungu kakutekelera mashaka goseri.

3 Gulitawi ligumba lyaku, gwee mgangamala!

Gwenga ndo muweru na yagwana ukulu.

4 Ukulu waku uweneyi na guweri mkanka,

paguwera gukwena farasi gulanguziyi visoweru vya mirandu ya nakaka unanaga pamuhera na haki.

Kwa liwoku lyaku lya kumliwu gulanguziyi matendu ga kuligangasha.

5 Misali yaku ikalipa,

ipena mumiyoyu ya wankondu wa mfalumi,

na maisi gaguwa pasi paku.

6 Gwee Mlungu shiti sha ufalumi waku sha mashaka goseri

luhonga lwaku lulikala mashaka goseri

gwenga gukolamlima wantu waku kwa haki.

7 Gufira uwaminika na kukalalira ukontola,

hangu Mlungu, Mlungu gwaku kakusyagula

na kukwitira lipaki lya nemeru kuliku wayagu.

8 Nguwu zaku zinunkira utuli na udi,

yawimba wankukunemiziya munumba za magoli ga ntembu.

9 Wahinga wa Wafalumi ndowamu yawadala yawakwanka,

na malikia kagoloka kumliwu kwaku,

kavala maherepizia ga zahabu iherepa ya ofiri.

10 Gupikani weri mhinga, guliholi, guyambiki likutu lyaku,

vinu gulyaluwi wantu waku na walongu waku.

11 Uherepa waku umkwegegiziya mfalumi,

yomberi ndo mtuwa gwaku gufiruwa kumjimira.

12 Mhinga Tiru hawakujegeri mafupu,

walunda hawafiri upendelewu waku.

13 Mhinga gwa mfalumi kankwingira kaherepa nentu!

Nguwu yakuyi ipotwa kwa ubunta wa zahabu.

14 Pakawera kavalira nguwu ya rangi zivuwa, kajegwa kwa mfalumi,

pakagenda pamuhera na wali wayaguyi,

na womberi viraa wajegwa kwa mfalumi.

15 Kwa kunemelera na kufyapila wankusoka aku

na kwingira munumba ya mfalumi.

16 Gwee mfalumi hagupati wana wavuwa

hawakolimlima pahala pa wazewi waku

haguwatendi wakolimlima pasipanu poseri.

17 Hanilitendi litawu lyaku liholwi viyiwuku vyoseri,

na maisi hagakuzyumi mashaka goseri.