1 Yakalikala paulolera wa Mlungu Mkulu,

hakalikali poneka kwa Mlungu Yakana Makakala,

2 hanimgambiri Mtuwa Mlungu,

"Gwenga ndo tugira ya neni na liboma lya neni,

Mlungu gwangu, yanikutumbira."

3 Nakaka Mlungu hakakulopoli mmugomiziwu,

hakakushingi na malweri yagalaga.

4 Hakakugibikiri kwa mibahira yakuyi,

na pasi pa mbapatiru zakuyi, hagupati ulolera

waminika wakuyi hawukuloleri na kukushinga,

5 hapenigutiri vitiriziwu vya pashiru,

pota likomangu lya vumu paluwala,

6 pota makomangu yagalawira pashiru,

ama malweli yagalawira paluwala.

7 Handa wantu elufu yimu pawahowa pakwegera na gwenga na

elufu kumi kumliwu kwaku,

kumbiti gwenga lidoda hapeni likusegeleri.

8 Kwa masu gaku gamweni haguloli na

kuwona wantu wakontola ntambu yawakomangwa.

9 Mana gwenga gumtenda Mtuwa Mlungu kuwera tugira yaku,

Mlungu gwa kumpindi nentu kuwera litumbiru lyaku,

10 hangu, hapeni gupatwi na madoda,

na numba yaku hapeni isegelerwi na makomangu goseri.

11 Toziya Mlungu hakawalagaliri wantumintumi wakuyi wa kumpindi,

wakuloleri poseri pagugenda.

12 Hawakukoli mmawoku mwawu,

nagwiza kulikwala mulibuhi.

13 Hagutimbi simba na njoka,

haguwapondi wana simba na njoka wana usungu.

14 Mlungu katakula, hanimlopoli ulii yakanfira,

hanimloleri yakamana neni na Mlungu.

15 Pakanshema na neni hanimwitikiri,

pakawera mkutabika haweli na yomberi,

hanimlopoli na kumpanana ligoya.

16 Hanimpanani makaliru matali,

Hanimlangaziyi ulopola wa neni.